يــــــــومـــــيـــات كبـــــــــــــــــل (يعني عشاق)

طبعا كلنا دخلنا الكلية (والي بالاعدادية انشاء الله على المستقبل )

اليوم جايبتلكم محاورة بين كبل

بلكي يعجبكم

طبعا الولد كل يوم ينتظر الكبل بباب الكلية
لان يحبها وراح يموت عليها
بس اليوم تاخرت وراح تبدي المحاضرة
وهي بعدها ما جايه المهم وصلت واخيرا

الولد :-
صباح الخير حبيبتي ليش اليوم اتاخرتي

البنية :-
حبيبي الشوارع كلها ازدحام (استحت تكول جايه بالتاته )

الولد :-
حبيبتي مشتاقلج وراح اضرب المحاضرة على مودج

وراحوا كعدوا بالحديقة (بدا ثرم البصل )

الولد :-
اني البارحة ما نمت للصبح بس افكر بيج (هو فاتح الجات وكاعد يسولف وي البنات للصبح )

البنية :-
اني همين البارحة ما نمت بس افكربيك (هي مخابرها صاحبها الثاني للصبح لان عندة خط عراقنا ابو واحد سنت بعد ال12 ليلا )

البنيه :-
حبيبي من كثر ما مشتاقتلك حتى ما اشتهي آكل(يعني حس عاد كوم ريكني ترا جوعانه )

اهنا الولد صار بموقف محرج
لان ما كو بجيبه غير خمسه الاف دينار للكروة (يعني اليوم راح دك قدم )

اخذها وراح للكافتريا مال الكليه وهناك

الولد :-
حبيبتي شنو تاكلين

البنيه :-
والله اني ما اكل غير كنتاكي وهمبركر من (ماكدونالد )

الولد :-
في داخل نفسه (شلون جذب ماعدنه بالعراق ماكدونالد )(بله لو باقي على الجات مو احسن )
وبعد ما خلص الريوك رجعوا بالحديقة

الولد :-
شنو هل الجمال حبيبتي شطالعه اليوم (طبعا هي مرعبله )

البنيه :-
مرسي حبيبي هذا بس من ذوقك

البنيه :-
وانت حبيبي على كيفك وي الحديد شويه مو راح تطفر عليه عضلة (هو جنه قلم رصاص hp)

الولد :-
شفتي الفلم البارحة على الart افلام

البنية :-
لاوالله لان جنت دا اباوع الفلم الاجنبي على show time
(طبعا اثنينهم ما عدهم كارت ستلايت وسهرانين على الفلم العربي على روتانا زمان )

الولد :-
حبيبتي شنو اليوم طالعة تخبلين
البنيه :-
شكرا حبيبي هاي الملابس ابويه جابليها من دبي من راح سياحة للامارات (هي مشتريتها من بالات البياع (قطعه بالف ))

البنيه :-
ريحتك تخبل حبيبي من مشتري هذا العطر

الولد :-
والله اخذته بورقة من الكرادة من مجمع الليث (ماخذه من باب الشرجي (حاجة ربع ))

الولد:-
حبيبتي الحجاب لايكلج

البنية :-
شكرا حبيبي مدام عجبك راح اتحجب (هي ما ملحكه تمشط من الصبح فلبست ربطة واجت للكلية (اسهل طريقة ورخيصة )بلاتسريحة ولاصبغ ولاهم يحزنون

الولد :-
تدرين صوتج كلة رومانسية (صوتها حتى الاطرش يسمعه )
وعيونج كلها حب وحنية (علما انها حوله )
وحلكج لوزايه (هي حلكها مجولك )
واناملج اسطوريه (لان ماكو مثلها بالدنيا )

البنيه :-
شكرا حبيبي
هاي لان انت عيونك حلوه وتشوف كل الناس حلوين
واذنك موسيقيه فتسمع الاصوات موسيقى عذبه

حبيبي لاتغركني بمشاعرك الفياضه ترا اني ما اعرف اسبح واغرق بشبر مي

وخليني اروح للمحاظرة لان عندي انذار 10 % لااروح انفصل
وشكرا حبيبي
وراح اشتاقلك هواي

الولد :-
باي حبيبتي (نزلت دمعه من عينه )(طبعا بسبب التراب مو من الاشتياق )

الله على الرومنسيه ههههههههههههههه يارب تكون عجبتكم

» الى عشاق النادي الملكي تم افتتاح ((عصابة عشاق الريال))
» اعضاء عشاق زمن علي
» عشاق هذا الزمان
» عشاق لكن يتالمون
» { نرحب بكم في ملتقى عشاق زمن علي }