الانتخابات

ياريت إنشوفك ياريت * ويّانه إبيوم التصويت
لا مو مقبوله الأعذار * ياهو الغيرك يحمي الدار
آني وأنت المدعويّن * بيدي وبيدك نبني البيت
ياريت إنشوفك ياريت * ويّانه إبيوم التصويت
***
إبهاي الساعه وهذا اليوم * خل يتحرر كل مظلوم
خلّي نأسس للأجيال * مو بس نبچي إعلى الأطلال
إرفع صوتك وإدعي الناس * گلهم هذا آني إختاريت
ياريت إنشوفك ياريت * ويّانه إبيوم التصويت
***
گوم إتحده التفجيرات * وإضمن حگك بالأصوات
ارسم لك لوحه إبكل صوت * وخل الما يفهمنه يموت
خل تفرح بينه الأطفال * خل نزرع ورده إبكل بيت
ياريت إنشوفك ياريت * ويّانه إبيوم التصويت
***
مسؤولية كل حر هاي * إيشارك شعبه إبهذا الرآي
كافي الگعده وكافي النوم * خل نعلنهه إبهذا اليوم
صرخه إمن الموصل للفاو * يعراگ إلشعبك رديت
ياريت إنشوفك ياريت * ويّانه إبيوم التصويت
***
من كل ملّه ومن كل دين * نتباهه إبحب النهرين
إشما تكثر بينه الألوان * وتتعدد عدنه الأديان
إضّل رايتنه إعلى المجموع * ترفض كل فرقه وتفتيت
ياريت إنشوفك ياريت * ويّانه إبيوم التصويت