انت الهوى والضوه

تمنيت چفك تدگ ... بابي ابنهار العيد



واركضلك ابلهفتي ، ونتحاضن ايد ابأيد



محتاج وك شوفتك ... هو اليحب شيريد



وارجف واصيحن صدگ ، انت صدگ ... مو وهم



جيتك اوعيد الفطر ، عيدين هلّن سوه .. او كلشي بعيوني ابتسم



او اوگف استعداد الك ... طالب ابأول سنه ، واگف ابرفعة علم



او مقتنع ... انت وطن ... وآنه بدونك عدم



وأقره نشيدي الك ... ياموطني ..او منيتي .. انت المهم والاهم



وانت الهوى والضوه ... او غلطان من ابعدت عنك واكلني الندم



يامنيتي او موطني ... ماحنه طولك وكت ... باقي انت ذاك الاشم



الباب يوسع شمس .. خل نفرح ابجيتك ، دوسة بخت هالجدم



العتبة صاحت هله ، والباب من شوگه الك ، جرله الف حسره



او بالبيت شوف اشألك ، محتفظ من ذكرى



اهنا رسايل امس ، اقراها بلكت تحن ..... لو بطلت تقره



وگلّب البوم الصور ، شو اشچنت ... وشصرت ...



بالحال انت ادرى



وهنانه باقة ورد ، بأنفاسك او ريحتك ... ليهسه متعطره



وك چم عيد مر او جزه .... ايشح هوى اسوالفك ... واختنگ بالعبره



والقسوه مو شيمتك .... امن امك رضعت الوفه ، او كل طيبة البصرة



وك چم عيد مر او جزه ... تجبر خواطر غُرب .... بس خاطري اتكسره



تجبر خواطر غُرب .... بس خاطري اتكسره