اماني الطفولة

عربانة دفع سترت هواي بيوت
وعوائل من عوائل عايشة عليها
جم طفل بطفل عاشت عمر وياه
وصارت مثل عرظة بروحة يفديها
طب للسوك باجر تلكة عدنا ورود
جف العوز كسر كل امانيها
بذرتهم قهر ونزرعت بالام
وحاصودة الوكت كل يوم يحويها
واحدهم نشوفة زغير من ابعيد
بس بدموعة تلكة الدنيا باجيها
تلكاه مو طفل بالهم جزة التسعين
البراءة اتحولت وحشية تاليها
للاطفال عيد وتفرح الاطفال
والفرحة اعتقد معروف راعيها
مو مثل اليدور كروة للايجار
هذا الماتمرة وما يمر بيها
بس عاشور عيدة ايصير تدري اشلون
اذا ظاع الشغل يكعد يحاجيها
فدوة لخاطر امي امبارك المسواك
وعندي اخواني جاعت وارد اعشيها
ويفتر بالولاية ويجي لهذا وذاك
عمي ايجار عيز وارد اوديها
ويجي لبيتة جسد والروح صح وياه
يجر بالروح كوة تكول سابيها
لان امة خطية امتانية اعلى الباب
ومن امة استحة بيا هم يلاكيها
الله مو طفل شايل صبر ايوب
اهموم الدنيا كلها براسة خافيها
الهالحد وصل عدنة الظلم والجور
مقبل ما ندعمة انحاربة اعليها
الوكت ظدة زكف واحنة وجميع الناس
هاي الناس مدري اشلون اسميها
رسالة لكل وزير زكل شخص مسؤول
وكل احزابنا لازم نوعيها
رسالة لكل ساسي بمجلس النواب
رسالة من الطفل بالدم نوديها
مو انة الكلت كل طفل هيج ايكول
وانا لسان الشعب وحجايتي احجيها
العربانة الدفع ندفعها وكت العوز
وتنطينا بكثر ما احنا ننطيها
ودفعناكم هسة بصواتنا بللا خوف
نفسها الدفعتك بترت رجليها
بيوت الشبعتك من مر عليك العوز
ذرة من الطحين اليوم ما بيها
فكر بالشعب وانتبه لا ينغاض
ويكاب من يضوج اسفها عاليها
لتكلي انتظر شنتظر منك خير
معاناة الطفولة شوكت نلغيها
ابفضل اصواتهم هسة انتم تحكمون
وهسة اصواتكم زادت بواجيها
هذولة اطفال لازم بس فرح يلكون
وادموع البواجي الكم نخليها
لان ذولة عطاشة ولازم انة وياك
نلم ادموعنا ودمعات نرويها
ولازم بالوجوب ومو بالاستحباب
العربانة الدفع مدرسة انسميها\
لان سترت اجيال وعلمت اجيال
وظيم الدنيا كلها وداعتك بيها
اذا مرت علنا اعتقد واجب صار
بالاستعداد نوكف من نحييها




تحياتي
هناء علي

جدا حلوة يسلموووووووووو [ندعوك للتسجيل في المنتدى أو التعريف بنفسك لمعاينة هذه الصورة]

عاشت الايادي



[ندعوك للتسجيل في المنتدى أو التعريف بنفسك لمعاينة هذه الصورة]