كلة منج

كلة منج انتي الي خليتيني احبج و احصد من الحب عذاب
و انتي الي كصيتي جنحي بلاية رحمة و طيريتيني بضباب
انتي وحدج عذبيتيني بغرامج و اني ادري الغرام بلاية باب
هاج احصدي الي زرعتة و شوفي حصدج شنهو جاب
هاج ضوكي الضكتة اني و كفي لومج كافي ما اريد العتاب
العتب لو ينفع جنت اني الاعاتب
العتب ما ينفع و لا يغير المصاب
الندم و الـ (لو) كلمات الوسافة
كلهة نار تزيد نار الاحنة بيهة و ما يطفيهة التراب
اني من اولهة كتلج انتي مو انتي الالي و مو اني الالج و احنة بسراب
و اني ردت اكصرهة وياج قصتي من يوم الحجيتي و كلتي احبك يا وهاب
كلتيلي احبك كتلج الحب نعمة بس خاف اضل بعيد وحدي
كلتيلي اريدك كتلج التردي الج لكن يبعد الروح ما من شي بيدي
كلتي و الحل كتلج الحل انتي حبيتي و اني شمرتيني علة دربي
و ما رضيتي و هذا تالي الحب يبيتي هذا تالي الحب يمن ردتي التحدي
شوفي وين اصبح هوانة و شوفي وين اصبحتي انتي
لا تكولين القسمة جارت و لا تقنعيني بعذر ما يسوة خمس فلوس عندي
خلي اعذارج تفيدج نسي روحج بيهة احسن و انسي كل كلمات ودي
انسي عيني البيهة رسمج و انسي صوتي الغنة باسمج
انسي مري و انسي شهدي انسي عهدج انسي جن ما عاهديتي
و يعينج على النسيان من حباج بعدي
خل يلومج جيف حبيتيني يوم و صيري انتي وياه ضدي
خل يضربج فوك وجناة البستهة حتة يمسح اثر وجدي
انسعدي ليه يلكلتي ما اضوك السعادة الا بربيعك
عيشي ليه يلكلتي ما عاش الي يبيعك
و اني تاليتهة انبعت و امسيت بس اجروحي تجري
روحي مبرية الف ذمة روحي يلشمتي حصدي
لجن اطلب منج طلبة وحدة اذا موكب زفافج من يمي تعدة
انا اترجاج بعينج تصدي
اطلبج منج تصديني بزفافج
مو قصدي استجدي من عندج نضر
اني ردت اقرة الورد الضاع من ايدج عطر
اني ردت اقرة شنهو ردة فعلج
يكولون الحب وفة و اخلاص و نزاهة
انتي جذابة علة الدرب ذبهة الدهر
انتي جذابة على الجرف ذبهة النهر
انتي غيمة سودة ما تسوين كلشي بلا مطر
انتي صبخة كاع لو تسكيج سبع بحور ما تنبت ثمر
انتي طعنة سيف بكليب السخي و يا حسافة الطعنة شكد تركت اثر
و سامحيني خاف كلماتي جرحنج و اني اسف حيل اسف و اعتذر
حسبيني مخبل و مسودن و اهذي و انتي تدرين المسودن منعذر
انتي تدرين صرتي شنو بالنسبة الي
انتي صرتي ورد جوري ما تسوين كلشي بلا عطر
انتي صرتي اوتار عودي الاعزف بيهة لحن قصتي
و ضاع من عودي وتر