نبذه عن الشعر الشعبي وكيفية كتابته ارجو التثبيت

هاي نبذة عن الشعر الشعبي وكيفية كتابته

بطريقة جدا مبسطة وغير متعبة وامثله جدا بسيطة نتعرف على طريقة كتابة الشعر باوزانه
النقطة المهمة انه ماعليك من التفاعيل بالاوزان ابدأ بالاذن الموسيقية فقط وستعرف فيما بعد انك كتبتها على الوزن الفلاني
اقصد الاوزان العربية وليس الاوزان الشعبية
حيث ان الاوزان الشعبية ترجع الى بحور الشعر العربي والمبتدأ الان بغنى عن البحور العربية لانها تتعبه
نبدأ بالشعبي حاليا
فلنتابع سوية
ساكتب الاوزان هذه

اولا وزن الموشح:::
يوجد قطع مرورية قبل السيطرات والمفارز العسكرية مكتوب عليها(((خفف السرعة امامك سيطرة))) هذا العبارة اللي بين قوسين هي وزن الموشح فاذا احببت ان تكتب اكتب للحسين ع على ضوء هالعبارة
ويكتب الموشح على عدة طرق اوضح منها طريقتين::
الاولى المربع:::
يا سليل العتره من مختارهه
انهض ورد للعقيده انوارهه
********
يا إمام الحگ يغايب يا ذخر
هذا مو آخر زمان اشتنتظر
طالت ايامك بعد ما ظل صبر
اجلي هم الارض وامحي اشرارهه
*******
يا إمام الحگ يعنوان المجد
اتجاوز اعلينه الدهر يحمل حقد
الظالم السيّاف والشيعه العبد
حاصر اعليهه الجهات ابدارهه
*****
لاحظ كيف عزيزي فأن اول بيت ياسليل العترة من مختارهه.....انهض ورد للعقيدة انوارها هذا هو المطلع هذا مطلع للقصيدة كتب بشطرين بنفس القافية
بعدها بدا المربع ثلاث اشطر بنفس القافية والرابع قفل انتهى بقافية المطلع يسمى مربع
اما الطريقة الثانية فتنكتب على شكل عمودي او تسمى اندلسي
وطريقتها هو تسلسل القافية بنفس الحرفين الاخيرات
في صدر البيت انته مخير بالقافية تجعلها قافية واحدة نسق او مختلفة
وفي عجز البيت شرط تشابه القافية
كالامثلة التالية:
المثال الاول انظر الى مقطع من احدى قصائدي بطريقة الاندلسي العمودي الشطر الاول تختلف القافية من بيت الى اخر بينما بقى العجز متشابه القافية

رد يعايل عايلك لا تستهين 00 وخل تهزك عالعراق العاطفه
عدنه شبان التهد حتى الجبال 00 وكالت العال اعله حده انوكفه
ماتطخ اجبين تعشك للجهاد 000 وخبر ذلتهه اجه امخبر نفه
رسمت ابدم النحر حد العراق 00 وهبت ابوجه اليضد كالعاصفه
رضعت البارود وي كطر الحليب00 وصار يتضهضب عرجهه اعله الوفه
كالت انكص الجفوف الما تذود 00 او وثبت الهالموزمه ومتراصفه

الان المثال التالي انظر الى تشابه قافية الصدر من بيت الى اخر والى تشابة قافية العجر من بيت الى اخر

(((المثال هو قصيدة الصرخة الهاشمية))

حيل حيل الحيل حاله اعلة المحال=وﮔـام ﮔـام الـﮔـام من صبرة اختنـﮒ
حي فزعته وصال صايود النزال=وصاح صاح السان زوده المارهـﮒ
غارغار وغار وجدان الرجال = وسيل سيل ايفيض والضده شرﮒ
اتشرعبت بيهه الحمية اعلة القتال=وغار غار الصيد للحومة شبـﮒ
صاح عباس الحشى اتمس الرحال= والغضب يتلضى بعيونه و شهـﮒ
صاح هيهات انحرم ماي الزلال= والشفاه تتأمل أبآخر رمـﮒ
ماتهز الحيد رميات النبال=ومن يهز الطود لو شرهه لبـﮒ
الى اخر القصيدة))))))

انظر الى تشابة القوافي بالصدر والعجز
***********
الى هنا اكون قد انتهيت من شرح مبسط لهذا الوزن وانا ممنون

نسولف سالفه اسمهه التجليبة
هاي التجليبة سهلة تجي على اللسان نفس سهولة الموشح
سامعين اغنية ((والعياذ بالله))لاجلبنك يليلي اثنعش تجليبة
يعني اقلبنك يليلي12قلبة
يعني هنا سهران ليلة
على كل حال مو هذا موضوعنا
سالفتنه :::
هاي التجليبة اللي مثلت بشطر منهه اجلبنك يليلي اثنعش تجليبة تنكتب على شكل مربع كما في موضوع الموشح السابق وتجي على شكل نص لقصيدة مكونه من مستهل او نكول عنهه مقاصير
اشلون بالله يعني مربع مثل الموشح
هذا مثال ::ولاحظ المطلع بالبداية وبالمقاطع صار قفل للمربع

(المثال من كتابات أبو رضا السماوي )

يافخر الهواشم ياﮔمــــــــــــــر عدنان
أنهض للمناية وزلــــــــــــزل الاكوان
****
خيّال أرد أشـــــــــوفك والدرع زودك
وأسحـﮒ عالمخاطر وأحرس أحدودك
مد ﭼفّك لسيفك وأخذ مريــــــــــــودك
صرخاتك أريدنهه تصــــــــــير أوذان
****
ﮔالــــــــــــوا بالحروب الميمنه أبطال
والبالميســــره ناس التخوض أهوال
يوليدي أرد أشوفك صاعقه وزلــزال
أزئر ياغضنفـــــــــــر وأﮔلب الميدان
****
ﮔالوا لووصل لأرض الطفوف حسين
سبعين ألف جندي أمخالف الكتـــرين
وأتسد الشريعة وتـﮔطــــــع الصوبين
أشرايك ياﮔمــــــــــر بمـﮔابل العدوان
*****
خل جسم الاعادي اعله النهـــر معبر
أنته اللي عهدتك فارس وقســــــــور
راويهم فنون المرجله التفخـــــــــــر
مدّ أبغيرتك ليّجزّر الطـــــــــــــــوفان
****
سبـــــــــــع النهروان المارجف ﮔلبه
والجيش الاعادي أمخالف الـﮔطبــــه
سيفك لايدانــــــــــــي أﮔرابك أيـﮔربه
خل يتبسمر أبـﭼفك يعالــــي الشان
****
لاتنســـــــــــــــه وصيّة والدك يمّه
ناداك ويردد بسمك الـﭼلمـــــــــــه
ضم حيلك ليوم الموزمــــــه ضمّه
يلفيك التريده وهالـــــوكت ماحان
****
لاﭼن التريده أتـﮔـــــــــرب أبيومه
وأتعنه المعاره وفزعت الحومــــه
يانصر وشهاده أصبحت محسومه
والكترين ألك بموازن الميــــــزان
*****
ــــــــــــــــــــــــــــــــــــــــــــــــــ ـــــــــــــــــــــــــــــــــــــــ
ــــــــــــــــــــــــــــــــــــــــــــــــــ ـــــــــــــــــــــــــــــــــــــــ
هسه انسولف سالفة ثانية
مثال على التجليبة تجي على شكل نص لقصيدة مكونه من مستهل
او نكول عنهه مقاصير
اتفضل هذا مثال نص التجليبة
والمقاصير والرباط
انظر الى التجليبة باللون الاحمر
اختلفت هنا مو مثل التجليبة المربع
(((ثلاث قوافي متشابهه والرابع رجع للمطلع))
لا اهنا الكل تشابة وراح على المقاصير

دارت عالطفوف وعدّت الازمــــــان
وانته اعله المجد مجدك ثبت برهان
ياسر كـــــن يكن بالطف تجلّى وبان
ياســـــــــــــفر العقيده ومنبع الايمان

يالبيك ارفعنه الهامات حي صحنه حسين ومامات
بركان الحب حين العبّر لمصابك يحســـــين اتفجر
من اول ليله ابعاشور
****
ياتاج الكــــــــرامه ومنهج الاحرار
دمك من نزف ظــــل ينبض الافكار
يامشعل يضّوي ابمســــــــلك الثوار
حبيناك وبخطك نظــــــــــل ا نصار
يملبسنه العزه اثياب يحسين الحبك ما خاب
ياشريان الدين الابهر لمصابك يحسين اتفجر
من اول ليله ابعاشور

عزيزي التجليبة تنقسم الى اربعة وثلاثين قسم على ما اذكر
خلينة على الشي البدائي والبسيط اللي يثبت ترسيخ وزن التجليبة والباقي الله كريم عود اذا الله منطينة العمر اكون بالخدمة
الشي المهم هو اخذ أي بيت من الابيات
انتهيت من هذا

الابوذية

وزن الابوذية هالموضوع المتكامل باربع اشطر ثلاث متشابة الجناس ورابعه قفله
يا ابو رضا؟؟ شنو معنى الجناس ؟؟

نعم اجاوبك ::
الجناس يقصد به تشابه المفردة كتابة ولها عدة معاني او يكولون عنهه نفس التفعيلة والله العالم اذا بعد اكو رأي ثاني

زين وين نلكيه هذا الجناس ؟؟
نلكيه مثلا بالابوذية مثل الابوذية التالية ::
وحك اللي طفح جودة ومنبر ((ومن بر يعني البر والتقوى))
صرح للمرتضى اتشيد ومنبر(( المنبر وهذا معروف))
غيور الملتزم نهجة ومنبر(( ومنبر يعني اللي يتبرأ من الولاء لابو الحسن ع)
برت منه الرسالة الاحمدية
((الجناس هنا هو كلمة ومنبر ــ حيث تكررت ثلاث مرات كما راينا لكنها اختلفت بالمعنى من شطر الى اخر ))

يكولون ترهم مفردة الجناس بتكرار المعنى بشطرين بس هذا يصير نشاز ونقطة محسوبة عالشاعرـــ فالافضل الابتعاد عنهه

يا ابو رضا شنو يعني يتكرر المعنى بالجناس من شطر الى شطر ؟؟

نعم اجاوبك:: يعني مثلا((قلنا مثلا)) ومنبر الاولى المقصد بيها هو المنبر الحسيني ولو فرضنا ان ومنبر الثانية اجت بنفس المعنى المقصد بيها ايظا المنبر الحسيني مثلا فهنا صار تشابة الجناس والمعنى بآن واحد ــــ هذا اللي لازم نبتعد عنه

وزن الابوذية ما يختلف عن النصاري نفس الوزن والفرق بحركة وليس بحرف
اعطيك مثل تكتب عليه
(((طبعا الاوزان الشعرية اختلفوا فيها فمنهم قال انها غنائية ومنهم من قال لا بل اهل الغناء اخذوها ))) (( هذا مو شغلنا هسه ما ينفعنا هذا)))
(( اكو اغنية والعياذ بالله تكول الاغنية ـــ حبيبي من تمر سلّم عليهّ)) هذا المثال خليه ببالك اكتب عليه شطر الابوذية
الابوذية قد تكون ذات بند واحد او قد تكون متعددة البنود

شنو يعني البند يا ابو رضا؟؟
الجواب::: يكولون صدر الابوذية او نص الابوذية يسمونه بند يعني تقريبا نكول يسمونه ((مقطع))

مثلا :::
وحك اللي طفح جودة ومنبر
صرح للمرتضى اتشيد ومنبر
غيور الملتزم نهجة ومنبر
شوف هاي الثلاثة الاشطر الكتبتهن هو هذا البند بدون قفل

متعدد البنود شنو
متعدد البنود يعني مقطعين او نصين او اكثر
اعطيك مثال ::
بطل والعلكمي ايعرفه بطلهه
شديد الباس ما داهن بطلهه
الاجت تحمل حقد سيفة بطلهه
المفاخر عد كمر هاشم سره الهه .
.. هلا بعباس من صال وسره الهه .
العدة للموت وكفتله سره الهه
وسكاهه الموت سيف الهاشمية
لاحظ كيف ؟ الثلاث الاشطر الاولى ((بجناس بطلهه)) يسمى البند الاول
ثم اتى البند الثاني ((بجناس سرة الهه)) ثم القفل (سكاهه الموت سيف الهاشمية)
اصبحت ابوذية متعددة البنود

وتستطيع ان تعدد بما تحب ليصبح متعدد البنود
(( وهذا موضوع البنود سيأتينا ايظا بموضوع الموال الزهيري فلننتظر بعون الله )))
طيب هسه خل نجي للقفل ::

شنو القفل
القفل هو خاتمة الابوذية وزنه نفس وزن النص اللي يحمل الجناس المتشابة ـــ لاحظه بالمثال التالي ::
المفاخر عد كمر هاشم سره الهه .
.. هلا بعباس من صال وسره الهه .
العدة للموت وكفتله سره الهه
وسكاهه الموت سيف الهاشمية((هذا هو القفل))

شرط بالابوذية يكون الحرف القبل الاخير هو حرف الياء وبعده حرف الهاء ــ لكن حرف الهاء يكتب ولايلفظ ((يه))((يه))
هسه نجي الى ملاحظة جدا مهمة وحلوة بنفس الوقت وهي تغيب عن الكثير من كتّاب الابوذية

خلي بالكم وياي

اعطيك مثال ابو ذية ونطبق عليهه لاحظ الان هذه الابوذية التالية//
العقيله اسمــــــي أنه الحره منامه
وصيّه احمل لابــــــو اليمه منامه
گبل عالغبره لا يصبـــــــح منامه
أقبّل صدره اشم نحــــره الوصيه
لاحظت الابوذية
لاحظ كلمة((الحرة))((اليمه))((يصبح)) هذه الكلمات في مضرب الابوذية هنا محط عدم انتباه الشعراء لها التي جعلتهم يقعون بالنشاز الشعري

طبعا هو ما يأثر على الوزن لكنه نشااااااااز

انظر الى حرف الراء والميم والباء هذه الاحرف الثلاثة ليس من حروف العلة
فالمفروض ان تكون الثلاث كلمات حروفها الاخريات ا ما من حروف العلة او لا (( اقصد الشطر الاول والثاني والثالث يكون تتشابة باحرف العلة او لا
يعني لانجعل الشطر الاول فيه حرف علة والثاني لا والثالث علة
فان المثال السابق انطبق بصورة جيدة لم تدخل عليهن حروف العلة
الان اعطيك بيت فيه نشاز شعري

وحك اللي طفح جودة ومنبر ((لاحظ حرف الدال هو ليس حرف عله))
صرح للمرتضى اتشيد ومنبر((لاحظ الياء حرف من حروف العلة))
غيور الملتزم نهجة ومنبر((لاحظ حرف الجيم ليس من حروف العله))
هنا اصبح نشاز شعري

فاما تكون ثلاثتهم من حروف العلة او ثلاثتهم حروف غير علة او لاتكون ثلاثتهم متشابهات
فالمفروض تكون اما ثلاثتهم من حروف العلة او ثلاثتهم حروف ليست من العلة
تعبت والموضوع يتبع معه والتكملة بعون الله جزء اخر من الابوذية
لان الابوذية فيها نقاط جميلة ان شاء الله نشرحها
تقبلوا تحيات ابو رضا

اللهم صل على محمد وال محمد

حيااااااكم الله

نكمل الابوذية

للابوذية عدة الوان اذكر منها اثنين فقط اللي اكثر الكتابة عليهم

اللون الاول.::الابوذية المدورة
اللون الثاني .: الابوذية متعددة البنود او ماتسمة ((ذات المشط))
اللون الاول ::الابوذية المدورة

هذا اللون لاتتصوروه صعب بل هو نفس الابوذية ماتختلف شي والاختلاف بسيط جدا وهو كما سترى
ان الشطر الثالث بالابوذية لايتم معناه الا بالقفل او الشطر الرابع حيث يكون الشطر الرابع (القفل )) مكمل معنى الشطر الثالث..هذه هو المدور لاحظ المثال التالي ((البيت لاحد الشعراء طبعا))

همي من كـــثر يذبل وراها
ونار الكلب مــا يخمد وراها
كل شده يـــهل وادم وراها
فرج ، والفرج من رب البريه

لاحظ كلمة فرج تممت معنى الشطر الثالث

اللون الثاني .: الابوذية متعددة البنود او ماتسمة (ذات المشط))
هنا تكون الابوذية كالتالي
كل ثلاث اشطر متشابهة الجناس تتبعها ثلاث اشطر متشابهة الجناس والقفل هنا لايكون بعد الثلاث الاشطر الاولى بل توضع باخر الابوذة مهما تعددت

هكذا::::::
3
3
3
القفل

كالمثال التالي((الابوذية في المثال لاحد الشعراء)

الدهر ياصاح بالفرقه ولانه
ولانوبه انكسر كلـبه ولانه
لا انت عرفت الحـب ولانه
نسينا الشوك واخلفـنا وعدنا
وعلى الهجران ردينا وعدن
هذا من الوكت والحب وعدنا
يفر بيه الوكت نوبه وفر بيه
ومن ثلج العمر دربي وفر بيه
اشرد وين انا بكلبي وفر بيه
بدرب مسدود ومتيه محـله
ادموعي جم ذنب كلبك محله
بعد طير بضباب ابدا محـله
ولا اظن بعد نتلاكه سـويه==هنا اصبح القفل فقط بعد نهاية البنود

-------
البند الاول هو::
الدهر ياصاح بالفرقه ولانه
ولانوبه انكسر كلـبه ولانه
لا انت عرفت الحـب ولانه
-------
البند الثاني هو::
نسينا الشوك واخلفـنا وعدنا
وعلى الهجران ردينا وعدن هذا امن الوكت والحب وعدنه
-------------
البند الثالث هو::
يفر بيه الوكت نوبه وفر بيه
ومن ثلج العمر دربي وفر بيه
اشرد وين انا بكلبي وفر بيه
--------
القفل هو::
ولا اظن بعد نتلاكه سـويه
------------------

لاحظت الان البنودالثلاثة؟؟ ثلاثة اشطر ب بثلاثة بثلاثة ثم القفل
تحياتي لكم واتمنى الموفقية للجميع

هناك الوان اخرى للابوذية تسمى المنثورة او((المذيلة)) وهناك الخماسية وهناك الرباعية وهيه غير متداولة فلا نحتاجها الان وسنعود لها فيما بعد

حياكم الله

سامعين واحد يحجي وي صديقة يكلة يمعود العن الشيطان

كلمتي العن الشيطان على وزن اسمة الحسيناوي
العن الشيطان العن الشيطان

وهذا الوزن قراه اكثر الرواديد القدامى وكان محبوب عندهم

ويكتب على شكل نص لقصيدة ويقرا كثيرا على المنابر الحسينية

وساعطيك الان مثال على الحسيناوي وكيف طريقة كتابته

المثل اقتطعته من احد قصائدي على العباس ع

لاحظ بالمقطع التالي

امن المهد ياحيد عاينك حيدر
وابجبينك شاف عالوفة تكبر
وتنتفض نوماس بيك يتفجر
درع اخوك حسين تصبح ومعبر
ذات او اصل بيك الوفه يالألك راية امرفرفه
هالراية يوم الملحمه فخر العرب بالموزمه
عباس الك صولة وعزم

هذا كل مافي وزن الحسيناوي وهو بسيط وغير متعب او معقد

ملاحظة هذا الشرح للشعر الشعبي قام به الشاعر أبو رضا السماوي

واليكم نبذة قصيرة عن الشعر الشعبي العراقي

نال العراق حصة كبرى من التخلف الذى اصاب الامة العربية والمنطقة عموما
مليسمى بالفترة المظلمة وماتبعها من عهود التخلف والتدهور التي امتدت طويلا
الى ان توجت بالسيطرة العثمانية وكان ابرز ما اتسمت بها تلك العهود ........
التخريب الثقافي والفكرى الذى رافق عملية التراجع الحضارى الذى فرض على
الامة العربية والذى امتد الى نمابعد نهاية الحكم العثماني للاقطار العربية والذى
من نتيجة هذا كانت الامية في العراق تضرب اطنابها وهي تسجل نسبة عالية
ومخيفة بين ابناء الشعب استمرت الى مابعد قيام مايسمى بالحكم الوطني في
العشرينات وحتي مابعد الخمسينات من القرن الفائد .
ولقد تدهورت خلال ذلك كل اساليب التعبير الادبي وانحطت كافة صنوف الثقافة
الفكرية والادبية .
في هذا الجو وبهذا المعيار كان للشعر العامي وجود ودور في الحياة الادبية والثقافية
وانعكس هذا النوع من الادب العامى في الصحافة المبكرة التي تأسست في العراق
مثل الزوراء وقرندل وغيرها ..
وكان للشعر العامي دوره في الحياة السياسية والاجتماعية العراقية كما سهم هذا
الشعر في تطوير وبلورة الوعى السياسي والنضالي لابناء البلد فكان لغة التعبير
الجريئة لمواقف المعارضة الوطنية واحد اسباب النقد الفعالة سواء انطلق باسلوب
انقد والساخر او الجاد مثل ماكان اللسان الناطق للشعب.
ولعل القصائد العديدة التي نظمها شعراء شعبيون مبدعون تمجيد الحماسة الوطنية
وتسجيل انتصارات الشعب في ثورة العشرين وكذلك شعر المرحوم عبود الكرخي
في الثلاثنيات ومابعدها خير تعبير عن الدور السياسي للشعر الشعبي في الحياة
السياسية والاقتصادية العراقية غير ان مرحلة اقرب ماتكون الى السبات والعقم
قد احطت بالشعر الشعبي ودوره الثقافي والوطني بعد رحيل الكرخي ...
ان هذا الاستعراض السريع يعكس دور هذا الشعر في الحياة العراقية .........

ارجو التثبيت

تحياتي

شكرا على المووضووع الروعة
الحقيقة الموضووع يحستحق الثتبيت
تحياتي

شـكــــرا
ريم الزبيدي
على هذا الموضوع الرائع
ولكن احب ان اضيف شي
ان الذي يكتب الشعر يجب
ان يكون لديه احساس
الشعر الابداعي
اي يجب ان يكون موهوب
انا الااتكلم عن نفسي والله
شــــــــاهد على مااقوله
ولكن يجب ان يعطي للشعر
احترامة وجمال احساسه
للكاتب نفسه
تقبلي مرمري

تحيــــاتي

شكرا يا يوسف القيسي وعلى رايك الجميل
وشكرا عالمرور
تحياتي الك يا مبدع

مشكور سرمد الزبيدي على هذا الكلام الجميل

واكيد الي عنده موهبة كتابه الشعر لازم عنده احساس

حتى يتمكن من اتقان كتابته

تحياتي الك يا مبدع

ومشكور عالمرور

» أوزان الشعر الشعبي الكامله مع التفعيلات ...
» الشعر الشعبي
» الشعر الشعبي العراقي ..... شحلااااااااااااااااااااااااااااته
» {ديوانية الشعر الشعبي لأعضاء وزوار منتدانا}
» شعر عن العراق ارجو التثبيت