شلون عيون عندك جنها لمضة سيف

شلون عيون عندك جنها لمضة سيف
وعيوني استحن من لمضة عيونك
يالكلك ترافة امن الجدم للراس
يا أصل الورد ومن الورد لونك
يالطولك قصيدة ومشيتك ومضات
ابوذيات خصرك كَوة يقرونك
يا رقّة غزالة بمشيتك ع الكَاع
وبضحكة سنونك داخت سنونك
خيعونك الغيرك كفر ما تنكال
هالكلمة اعلى مودك بيك خيعونك
شبهوك ابكَمر وانته احلى منه هواي
ضم روحة الكمر عن لا يشبهونك
ولو قباني عايش بعدة والسياب
يعوفون الشعر عن لا يكتبونك
اشلونك كَبل تحجيها من اتفوت
وبعدة الكلَب ينبض بس بالشلونك
قصايد غزل كتبوا ناس كَبلي هواي
وانته شلون يمعوّد يكتبونك ؟
شافو بس خيالك عيد كَالوا هاذ
اشتضن شيصير بيهم من يشوفونك
بالصف كاعد انته وكلها رسبت بيك
وانتة بسحر عينك .. مية ينطونك
رسب حتة المدرس كتب بيك انذار
وحارو يا مكان البي يخلونك ..
واتفقت عليك الناس كلها تكَول
منهج بالمدارس خل يدَرسونك
ياربي تعجبكم تحياتي