يلعينك بحيرة بكل هدوء الليل

الواحد فرد مايقبل التقسيم
بس آنة أنقسم وبدونك أتعدد


أتقسم بدونك وأنجمع وياك...
لأن كلي وية كلك.. بيك أتوحد


جنت جاهل وأجيك أتشرد من الناس
هسة تعلمت من نفسي أتشرد


عشكتك ذرة ذرة و صرت أغار عليك
إذا محد يبوسك أذبح المحد


ولك لاتنطرح يم ناس تعبانين
مو طولك حصار شلون تتمدد


وشعرك ليلة ظلمة أتوحشت عالريح
كلما هب عليها أتلفلفة بأسود


وجبينك إيد موسى المعجزة البيضاء
مو حقة الكفر من شافك تعبد


و نور اذنك والزلف خطار
مرة يحط عليهة و مرة يتبعد


وجفنينك سمة ومجفي اعلة رمشك ليل
اذا ترمش يضل فرقد يطك فرقد


يلعينك بحيرة بكل هدوء الليل
ودموعك نوارس لو مشت علخد


وعلة خدودك صور منقوشة من بوسات
أباوع بالصور مابايسك أحد


وشفتينك شمس من تبتسم نصين
يكطعهة البرق وبنصهة يتجمد


يبو إيد الثلج لاتطلع بتموز
موخاف الثلج خاف الخلك تبرد


واذا لا موثلج كل هلبياض منين
معقولة العظم فوك الجلد يصعد


يلجتفك منارة بيا شرع يا دين
أموت من العطش وكبالك أتشهد


وحدر جتفك فرات ودجلة ملتقيات
و شفت شط العرب جوة الجتف ممتد

يبو تاج الكطن ليش أفتحتلك باب
مو خاف الكطن بلعين يتفرهد


خطواتك حظارة و خصرك التاريخ
اذا تمشي العرب فوك الفرس تصعد


من يمي من ىتمر يجبرني حسن البيك
أوصفنك لجن من وصفك أتردد


لذالك ماوصفتك وأعتذر يهواي
وصفت الخيال المنك توولد
وصفت الخيال المنك توولد








__________________

القصيده حلوه وعاشت الايادي كوران وننتضر منك المزيد وتحياتي الك

شكرااااا لمرورج يا مي محمد

شكرااا لمرورج يا تقى

شكرااااااااااااا لمرورج يا هديل الحمام