اجمل قصيدة شعبية عن علامات يوم القيامة

· باسمـــــك يا خالـــق 100 رحـمــة ***** 99 ليوم الحســــــاب

· و رحمـــــة وحــــدة راهي مقسومة ***** بيناتنا كامل حنا و الدواب

· يامـــــن فضلتــــنا على كل امــــــة ***** بآخر دين و بآخر كتاب

· و بآخـــــر نبـــــي نبي الرحمـــــــة ***** عليه الصلاةو السلام و اهلو لحباب

· خلاص النـــــاس كامل راهي عالمة ***** بلي الاسلام هو الدين الصواب

· ودّوا الكفار لو كــــــانوا كيما ***** حنايــا مسلمين آه يــامن صـاب

· لكن و لكن ديما هــــــادي الكلمـــــة ***** تبقى متبعتهم حتى للتراب

· خاطر ديننا ربــــــي دارلوا قيمـــــة ***** ماقدرولوش و عليهم صعاب

· لقاو بلي ديننا العقـــــــل و الحكمـــة ***** والقلب و الواقع كامل صحاب

· ماشي كيما هوما الــي كانوا ديمـــــا ***** يحرّموا استعمال العقل في الكتاب

· أما ديننا حنايا فيه شحال من كلمـــــة ***** الذين يعلمون و أولي الألباب

· و يخشـــاو الله عبــــادو العُـــلامـــــا***** الي قراو حاجات لقاوهم صواب

· سمعنـــــا مـــرة بلي لقــــــــاو المـــا ***** في وسط البحر صالح للشراب

· و البحر المسجور فيه المــــــا يحمى ***** و الجمر من تحتو يلهب لهاب

· و زيد الصلاة لقـــــــاو فيــها حكمــة ***** مع الأدرينالين الزايدة في الاعصاب

· و حتى من الصيام والوضوءوالحجامة ***** وحتى من التسلام و السترة و الحجاب

· لقاو المضرة ف الصوالح المـــــحرمة ***** و لقاو في الطاعات الحل الصواب

· و لقاو في القــرآن كتابـــــة مرقومــــة ***** إعجاز في أبواب العلم و الآداب

· و لقــــــاو حتـــى علامــــات القيامــــة ***** سبحان الله حتى علامات القيامة الي مدكورين ف السنة و الكتاب

· راهــــــم يبانــــــوا علامــــة بعلامــــة ***** و درك نحاولوا نعملوا لحساب

· نبداو بالصغـــــار و هادوا هومــــــــــا ***** اللولة القرآن آخر كتاب

· سيدنــــــا محمــــد تنبعت للأمــــــــــة ***** كآخر نبي فوق هدا التراب

· قـــال في حديــــــت بإشارة و كلمـــــة ***** بزوج صباعتين الاوسط و السباب

· قــــال انا و الساعة تنبعتنـــــــــا كيمــا ***** هاد الصبع و خوه و ديروا لحساب

· و دكر من بين علامات القيامــــــــــة ***** الحفاة العراة الي يرعاو الدواب

· يطاولوا في البنيان وفي كل حومــــة ***** يتنافسوا شكون يدير بنيان شباب

· و دكر تانيت بيـــــــــوت الحــرمـــة ***** الجوامع تتزخرف من الباب للمحراب

· و تولي الناس ما عندهاش كلمــــــــة ***** تضيع الامانة و يكتر النصاب

· و بين العلامات لما تشـــــوف الآمــة ***** تولد ربتها كي يلحقوا لعقاب

· و تولي الطفلة في يدهــــــــا الحكمــة ***** تحكم في يماها و يتبدلوا لحساب

· تكتر الزنا تولي جهـــــــــــراً قايمــة ***** تولي مباحة و يكتر الشراب

· يشربوا في النهار ماشــي في الظلمة ***** راجل و مرا شايب و شاب

· و الخاين لتما تولي عندو قيمـــــــــة ***** والي يقول الحق يتسمى كداب

· و تولي الامور و المناصب هايمــة ***** واحد ما محطوط في المكان الصواب

· تكتر البدعة الناس تجيب كلــــــمة ***** من الشرق من الغرب و تقول من الكتاب

· الحرام حلال و الحــــلال محرمــة ***** يفتوها و يغروا بيها الشباب

· و يروح لحيا و تروح الحشمـــــــة ***** و الراجل يولي كيفو كيف الدااب

· و المرا الي كانت كيف هديك الحمامة ***** تولي كي لغراب تتمرمد ف التراب

· كاسيات عاريات لا حيا لا حرمــــة ***** لا نيف لا حكمة لا أم لا أب

· و هديك الوحدة الي تكون محترمــة ***** يضحكوا عليها كي دارت حجاب

· و زيد من بين علامات القيامـــــــة ***** الفتنة و الحرب في كل تراب

· تكتر المصالح و تتشتت الامـــــــة ***** تكتر الطوائف و يكتروا لحزاب

· تروح البركة و تنقص النعمــــــــة ***** و يولوا النسا كتر من الرجال حساب

· و يولوا الحكام شيعتــــــهم زُعمــا ***** ما يحكموش ف الشي الي جا ف الكتاب

· و آخر علامة كي يموتوا العُلامـــا ***** و اكبر العُلاما راهم تحت التراب

· ما بقالنا غير ندعولهم بالرحمـــة ***** الصغار خلاصو و الكبار قراب

· علاش ماشي خير نخرجوا مالظلمة ***** ومن درك نبداو نديروا لحساب

· و نتوبوا قبل ما تظهر علامــــــة ***** من علامات الكبرى و يتنغلق البــاب

· أول علامة لما يبان لــــــــعمى ***** المسيح الدجال لعور الكداب

· كان كل نبي جا لكل امـــــــــة ***** حدرهم منو و من فعايلو الصعاب

· يقول انا رب الجنة و جهنــــــمَ ***** انا هو ربكم رب السما و التراب

· يوريلكم جهة خضرا فيها المــأ ***** و جهة فيها النار و فيها العداب

· إلا شفت الجنة هديك جهــــــنمَ ***** و إلا شفت النار العكس هو الصواب

· يقتلك و يحييك و انتا قولو ديما ***** محال تكون ربي و انتا ماشي شباب

· يزعف ولتما تظــــــهر كلمـــة ***** مكتوبة على جبينو كافر , كداب

· وإلأ كنت كافر تولي كيفو عمـــى ***** يفتنك و يغويك و يرميك للعداب

· و يبقى هكدا يفـــــــــتن ف الامة ***** من مكان لمكان و يروح وين حـاب

· إلا المدينة ومكة المكرمـــــــــــة ***** مايدخلهمش و يوقف في الباب

· و تظهر لتمـــــا تاني علامـــــــة ***** عيسى عليه السلام من اهل الكتاب

· رافدينو الملايكة محبطينو من السما **** على الصبح يحط رجلوا ف التراب

· يفرحوا النصارى و ممبعد لتمــــا **** يتبرأ منهم , من القوم الصلاب

· يقول انا نازل من خير امـــــــــة ***** امة الاسلام ماشي من اهل الكتاب

· نتوما الي صلبتوني و تهمتوا يمه ***** تهمتوا حتى ربي الرحيم التواب

· الي رايح يتوب ع الامة المسلمة ***** و نتوما يدوقكم أشد العقاب

· سيدنا عيســـــى يقــــــــتل لعمـى ***** المسيح الدجال لعور الكداب

· و ينشر الخير و ينشر الرحمـــة ***** و دين الاسلام مايخلي حتى باب

· و لتما تظهر تالت علامــــــــــة ***** يظهروا قوم بزاف صعاب

· يأجوج و مأجوج أكبـــــر أمـــة ***** يخرجوا م الارض ,من تحت التراب

· ياكلوا الخضرا و اليابسة و النعمة ***** ياكلوا كل حاجة تنصــاب

· اللول يفوت على واد فيه المـــــا ***** و اللّخر يلحق يلقى غير التراب

· و الناس يجيهم امر من السمـــا ***** اهربوا للجبل ما تبقاوش قـراب

· يهرب سيدنا عيسى و الامــــــة ***** يدعيوا في ربي يخفف لعداب

· ربي يرسللهم طيور من الســما ***** تحطم هدوك القوم الصعاب

· تقدفهم بالحجر و الحجرة مسومة ***** باسم مولاها و تطرحوا ف التراب

· كي يحبطوا يلقاو جتتهم ملمومــة ***** تلقى وين تعفس آه يا من صـاب

· كيف كيف . يدعيوا, الجتت تترمى ***** يرفدوهم الطيور لوين ربي حب

· و تبقى ممبعد الريحــــة و الغمـــة ***** و يدعي عيسى و دعاه مستجاب

· ربي سبحانو يبعتلهـــــــــم غيمــة ***** تنظف الارض و تطهر التراب

· ينتشر الخير و البركــــة و النعمة ***** و عيسى يحكم بالعدل الصواب

· يحكم بالقرآن و تنتشـــــر الرحمة ***** كل واحد يلقى كامل واش حب

· سيدنا عيسى يكمل المهـــــــــــمة ***** يموت كيما غيرو ويتندفن ف التراب

· و الناس لتما تعاود تولـــــي كيمـا ***** كانت ف اللول و يتخلطوا لحساب

و العلامة الرابعة هي الدابة المتكلمة

· و تظهر لتما الدابة المتكلــــــمة ***** جساسة تخرج من تحت التراب

· تطبع على الناس و هي الخاتمة ***** مومن او كافر و تغلق الباب

· خلاص, وممبعد تهب ريح نسمة ***** تدي كل مومن مطبوع و تاب

· و تخلي الكفار و تتخـــــــلط لتما ***** الجهل و الكفر و يترفع الكتاب

· يترفع العلم و تعــــم الظــــــــلمة ***** السرقة و الحقرة و قطع الرقاب

· و يعاودوا يعبدوا الاصنام الصمـا ***** الي ما تسمع ما ترد جواب

· اللات و العزة و منات و كيمـــــا ***** بكري يعبدوا كل ما ينصاب

· يغضب ربي و الشمس لتــــــمــا ****** تروح باش تسجد يردها م الباب

· ولي منين جيتي و الناس مهيش فاهمة ***** يولوا سُكارى من غير شراب

· حتى المرضعة تدهـــــــــــل لتمـا ***** في من رضعت ضنها خـــــاب

· ويلحق نهار قبل القــــــــــــــيامة ***** تشعل النار و الجمر لهاب

· من ارض الحجاز تلمهم الطــامة ***** تلمهم كامل بعاد و قراب

· في مكان واحد و ممبعــــــــد لتما ***** يبان الهول و الصوالح الصعاب

· تتفجر الدنيا , تولي عايمـــــــــــة ****** ويدان و بحور يخرجوا من التراب

· تريب الجبال , تنشق السمـــــــــا ****** يغضب ربي وحنايا لسباب

· تتزلزل الارض , تقوم القيامــــة ****** ينفخ في الصور و نتقدموا للحســــــــــــــآب .................الف تحية لكم عسى ان تنال رضاكم ..........تحياتي المبرمجة [ندعوك للتسجيل في المنتدى أو التعريف بنفسك لمعاينة هذه الصورة]

اللهم صل على محمد واله

الله يعطيج 1000000000000000000 عافية

قواج الله اختي

عاشت ايدكم

زائر

شكرا يا سالي على
هاي القصيدة
الجميلة و الروعة
تقبلي تحياتي

عاشت أيدج قصيدة روعة روعة روعة ... تقبلي مروري ....

تحياتي أشرف علي ملك الرياضة ....

شكرا سالي الوردة اختيار رائع

زائر

شكرا يا ساااااااالي علا القصيدة الجميلة تحياااااااااااااتي

تحياتي الج سالي شكرا عالقصيده

حيدر الشرطي

تحياتي الكم واشكركم للرد وانتوا اكيد مبدعين

تحياتي

خوش تكتبين

[ندعوك للتسجيل في المنتدى أو التعريف بنفسك لمعاينة هذه الصورة]

تحياتي لك يااحمد وشكرا لردك على الموضوع

شكرا سالي

اشكرك لردك يايوسف

» قصيدة عن مدن العراقية.........
» قصيدة تفوتكم
» قصيدة بعنوان امي
» قصيدة.....
» قصيدة عن المدرسة .......