عراق الشرف

يا عراق الشرف

ابدمع عيني كتبت احروف
وبدم بروزتها او صغت عنوانة
وطن وانة اعلى حظن الوطن ملهوف
شكتبلة اوشكَلة ابكَلب نيشانة
ابخستاوي العراق امكَمط او ملفوف
او من دجلة او فراتة الدنيا رضعانة
عراق ابيا كواكب بعد مثلة نشوف
لو حسوة كَهوته ابجعب فنيانه
او وين الكَة بعد مصموط لو ذعذاع ريحة سمجك المسكَوف
او وين الكَة المظايف ذيج لو حجي المسنع وسط ديوانه
مو صوف التشوفة العين وانتة الما الك موصوف
عراق شما وصفنة الكون وصفك وصفة دلانة
هلي الغربة اشكَبحها بس تشكَ وتروف
نواكحها وتواكحنا جوية ابساع تلوانة
هلي ها ها ترانة ابجفت المشحوف
الجليلو يا هلي لو مال يولانة
دمه وتراب لعيون العراق اندوف
ومن يعطش نشربه البكَة امن ادمانه
عروس الدنية يعراكَي ولك بغداد حلوة ازلوف
او جناجل بصرتك والكوت وانبار او سلف عانة
رغد نام ابحظنهن وامن امن الخوف
ونكر كل جبان انتكس نكرانه
وطنا البلمخاطر من ولد محفوف
عبرهن وحده وحده او وصل لهنانة
نمطره الكون لجلك بس جثث وجفوف
او نكَلب كل وجوده كَبل ميحانة
تكَب حتى العجايز والعمه او مكفوف
او قنابل لليمسة ايفجر ادنانه
او رشاش الشلب يصبح اكلا شنكوف
او جبال الشمال اوحمم بركانة
اهو هذا العراق امن انولد معروف
بس لله يركعه جلة سبحانة